EGYFOX! RAT

البداية، وأشياء أخرى عبثية

البداية كانت مع جهاز خالي في أوائل الألفينات تقريباً 2001 كنت لسه طفل عندي 8 سنين في تانية ابتدائي، بس انا فاكر كويس ان كان عندي كم هائل من الفضول وقتها اني اعرف كل حاجة عن الجهاز ده شغال ازاي، بدأت أتعلم بالملاحظة من كل واحد بيجي يفتحه ويشتغل عليه شوية، أوقات كتير كانوا بيفتحوا لي “الرسام” وأقعد اشخبط فيه شوية، وفي مراحل متقدمة شوية بدأت افتح “الأوفيس وورد” واتعلم الكتابة بسرعه مقبولة لحد ما اتعودت على اماكن الحروف، الألعاب كان ليها دور كبير جداً في زيادة فضولي عن اني اعرف ازاي بتتعمل وازاي بتشتغل، كان في وقتها ألعاب كتير لسه فاكرها لحد دلوقتي وأتمنى ارجع العبها تاني الأيام دي لأن تقريباً قضيت فترة كبيرة من طفولتي عليهم زي Recoil , IGI, Red Alert 2 ، ده طبعاً بالاضافة لألعاب الفلاش اللي كانت مشهورة جداً وقتها خاصة بتوع موقع MiniClip.

لحد في مرة كده وانا بدعبس في فولدر الألعاب ده لقيت لعبة شكلها غريب كده ومكتوبة بالعربي، أول ما فتحتها لقيتها اخدت مساحة الشاشة كلها ومكتوب فيها رسالة بخط كبير أوي كده ، انا لسه فاكر الرسالة لحد دلوقتي كانت بتقول ” هناك خطأ في جهازك ، ربما لسوء الإستخدام ، لذلك هل أنت حمار ؟ ” وتحتها زرارين كده واحد ” نعم ” والتاني ” لأ ” ، واللعبة كلها كانت في انك لما تيجي تضغط على زرار ” لأ ” يقعد يلف ويبدل مكانه مع زرار ” نعم ” لحد ما تبقى مُجبر في الأخر انك تضغط على ” نعم ” ويطلعلك بعدها رسالة مستفزة ” ماشي ياعم الحمار ! ” وتحتها جملة صغيرة كده ” برمجة : فلان الفلاني ” وتقفل اللعبة !!!

انا فضلت طول اليوم بقى فرحان بالحركة دي وأعملها مقلب في كل اللي يجي يقعد على الجهاز، لحد ما بدأت أفكر بقى مين الشخص ده ؟ وعمل اللعبة دي ازاي ؟ وازاي أقدر اعمل لعبة زيها ؟ وازاي قدرت توصل للجهاز بتاعنا ؟ وايه البرمجة دي ؟ وأسئلة كتير من هذا القبيل وللأسف وقتها ماكنش في اجابات مُرضية لفضولي لحد بعدها بفترة بدأ يكون ليا علاقات مع ناس اكبر مني وعندهم كمبيوتر من زمان وقدرت أفهم منهم بقى ان في حاجة اسمها لغات برمجة واللي كان منتشر جداً وقتها لغة Visual Basic 6 وبدأت بقى اروح السايبر وابحث عنها واحاول افهم ايه الموضوع بالظبط ووقتها طبعاً ماكنش في يوتيوب ولا مصادر كتيرة جداً زي دلوقتي ، وفي الوقت ده كانت المنتديات العربية ليها تأثير كبير جداً في انك تلاقي المعلومات اللي محتاجها، وطبعاً أول حاجة عملتها أول ما اتعلم برمجة هي اني أعمل اللعبة اللي عرفتني السكة دي:

هناك خطأ في جهازك، هل أنت حمار ؟
سكرين شوت من أول الحاجات اللي عملتها أول ما اتعلمت البرمجة

في الوقت ده كنت مذهول جداً بفكرة الهاكينج وكنت مهتم بتعلمه جداً وكان نفسي اعمل برامج هاكينج بنفسي زي اللي كانت مشهورة وقتها زي Sub7 و ProRat وغيرهم كتير بقى لسرقة باسوردات الياهو والماسنجر وفعلاً دخلت في المجال ده فترة كبيرة بس كان وقتها كنت بعمل الحاجات دي لغرض الترفيه والتسلية بس اتعلمت فيها كتير جداً وعملت مشاكل ومصايب كتير وكان الفضل بردو يرجع للمنتديات العربية على ما أفتكر أساميهم كانوا ” القراصنة العرب ” و ” منتديات الصاعقة ” وكان في منتدى كده عمري ما هنساه نهائي ونفسي ألاقي حد كان يعرفه او حد من اللي كانوا شغالين عليه، المنتدى كان اسمه ” عصب ماي ” – ده رابط لنسخة أرشيفية منه – كان منتدى صغير كده ومركز أوي على حاجات معينة ومافيهوش مواضيع أي كلام والناس اللي فيه كانت كلها محترمه وبتشرح كل حاجة بأسلوب بسيط فـاستفدت منه كتير جداً في الفترة دي، طبعاُ كان في منتديات تانية كبيرة في الوقت ده كانت بتاخد أغلب وقتي من التصفح على الانترنت زي ” برامج نت ” و ” ترايدنت ” و ” فيجوال بسيك العرب ” و ” الفريق العربي للبرمجة ” دول تقريبا كانوا مصدر معلوماتي في البداية عشان كده هتلاقيني متأثر جداُ في الحاجات اللي كنت بعملها بالطابع الديني وكنت بختار أسماء مستعارة (EGYFOX) زي اللي كانت منتشره وقتها، وطبعاُ بالاضافة لشوية مواقع ومنتديات أجنبية بيقدموا نفس المحتوى.

EGYFOX! RAT
محاولة عمل برنامج لإختراق الأجهزة

الفترة من 2006 ل 2010 كانت فترة مميزة في حياتي ، كان عندي 13 سنة، كان عندي شغف رهيب جداُ في اني اتعلم وأجرب حاجات كتير، وفعلاُ الفترة دي اتعلمت فيها كم هائل من المعلومات المختلفة في كذا مجال، أي نعم وقتها الموضوع ماكنش مرتب وبمنهجية واضحه وأغلبها كانت قراءات متفرقة ، بس كان ليها تأثير كبير لإدراكي لحاجات متقدمة بعد كده بسهولة، الفترة دي كانت بالنسبة لي مرحلة التقليد، كان كل هدفي وقتها ان اي حاجة بشوفها قدامي وتعجبني او تثير فضولي اني لازم أقلدها وأعمل زيها، عملت حاجات كتير جداُ تافهه وأي كلام، وواحدة واحدة بدأت اعمل برامج مفيدة وبرامج تساعدني في المشاكل اللي بقابلها في الكمبيوتر او في الدراسة بتاعتي ، انا فاكر وقتها كنت بعمل برامج اكتب فيها ملخص شرح المادة اللي بذاكرها ، يعني بدل ما اسهل على نفسي وافتح ملف وورد وأكتب فيه ، كنت بكتب الملخص في الكود وأقعد أعمل لكل درس فورمه وزراير وحركات ، وكنت وقتها بتعلم فوتوشوب وفلاش، فكان عندي فراغ لدرجة اني ممكن اقعد اعمل لكل عنوان لوجو وفلاش متحرك.

قمة الفراغ اللي في العالم لما كنت برضي ضميري اني بذاكر وبعمل الحاجة اللي بحبها 😀

من ضمن الحاجات اللي كانت وقتها مفيدة بالنسبة لي ان كنت بعمل برامج تـسهل عليا الحاجات اللي بعملها باستمرار فكنت بعمل Tools & Utilities كده على قدي تعمل الموضوع ده وواحدة واحدة بدأ صحابي تعجبهم الحاجات اللي بعملها دي وياخدوها يستخدموها ويقولولي على المشاكل اللي فيها عشان اظبطها وهما نفسهم اللي يطلبوا مني حاجات جديدة ويدوني افكار لحاجات ممكن تحل المشاكل اللي بتقابلهم ، فضلت على الحال ده فترة طويلة أوي ، وعملت حاجات بدائية وحاجات وقتها كانت مفيدة جداُ وعملية ، بالذات الفترة اللي كان منتشر فيها جداُ فيروسات الـ Autorun انا عاصرت الفترة دي من أولها، وكنت مهتم أوي بالموضوع ده ودايماُ بقرأ في الحلول بتاعته وانزل البرامج المخصصة للتعامل مع النوع ده وافهم هي بتعمل ايه بالظبط وعملت برنامج وقتها كان بيعمل كذا طريقة للحماية من النوع ده او ازالته تماماً :

برنامج لحذف فيروسات Autorun
برنامج لحذف فيروسات Autorun
برنامج لحذف فيروسات Autorun
برنامج لحذف فيروسات Autorun

 بس انا فاكر قبل ما اعمله كان لازم ادخل في اللعبة الأول واعرف ايه الفيروسات دي وبتنتشر ازاي وبالفعل بدأت اقرأ واتعلم في الموضوع وعملت كذا تجربة ، ومن ضمنها فيرس بيتشر عن طريق نفس ثغرة الـ Autorun وكان بدأ ينتشر في المحيط اللي انا ساكن فيه بس انا كنت عامل فيه backdoor ليا عشان وانا بجرب اعرف اوقفه او لو حد من اصحابي وصله اعرف اوقفه ، والجدير بالذكر اني كنت غبي لدرجة اني كنت حاطط رقم تليفوني عشان لو حد عاوز يمسحه يكلمني واقوله يضغط F7 ويكتب اسمي في المربع اللي هيطلع قدامه والفيرس هيشيل نفسه وترجع كل حاجة زي ما كانت!، هو عموماً ماكنش بيعمل حاجة مضره في الجهاز على قد ما كان مزعج لأنه بيظهر تايمر صغير كده فوق الساعه always on top ان الجهاز هيطفي بعد وقت عشوائي معين، فكانت تجربة غبية الحقيقة بس اتعلمت منها كتير، لدرجة ان الفيرس اللي عملته بعدها كان قليل الأدب شوية ، كان ليا صديق بيعرف يقلد الأصوات أوي ، جبته وقعدنا نسجل شوية شتايم الضحية هيسمعها لما يجي يعمل حاجات معينة على جهازه، لو جه يفتح السي دي رووم مثلاُ يلاقي صوت اشتغل لوحده يقوله ” اقفل السي دي يا مغفل” يجي يلعب لعبة معينة الفيرس يقفلها ويشتمه وهكذا ، اليوم اللي خلصت فيه الفيرس ده ومتحمس جداُ انا وصديقي اننا نجربه مع اول ضحية ، فروحنا لبيت واحد صاحبنا وحطينا الفيرس وظبطنا الدنيا وهو بره الاوضة بيعملنا الشاي ، وفجأة  والده دخل يعمل حاجة على الجهاز واحنا قاعدين وكنا مخليين الصوت اعلى حاجة وفجأة الراجل كان لسه هيتشتم قومنا جري نكتم الصوت ونلحق المصيبة دي ومات الموضوع على كده.

سبلاش سكرين لأول الفيروسات اللي عملتها :D
سبلاش سكرين لأول الفيروسات اللي عملتها 😀

الفترة دي انا كنت بعمل حاجات كتير كانت تعتبر الترند في وقتها زي اني اعدل على نسخة Windows XP واعمل واحدة بإسمي بقى واظبطبها بالبرامج اللي بحتاجها والثيمات وكده، والوقت ده ماكنتش لسه مستوعب فكرة الـ Virtualization بس كنت مبسوط ان في برنامج -تقريباً Virtual PC- بيخليني انزل Windows 98 على ويندوز XP عشان اشغل العاب الـ PlayStation 1 كويس ،في الوقت ده بردو كنت بعلب PES 6 انا واصحابي كتير وكنت مهتم بقى انزلها اجدد الباتشات بتاعتها واصحابي يجوا يلعبوا عندي وكده ، فكنت عملت Game Cheat للعبة يزود الاسكور بتاعي ويحسب لي جول زيادة اول ما اضغط على F1 في الكيبورد ، فكنت ببقى بلعب مع اصحابي واول ما تيجي هجمه لحد فيهم وتضيع اللعبة بتعمل replay فقوم انا عامل نفسي بضغط ESC في الكيبورد عشان ننجز واضغط F1 معاها فيتحسب لي جول واللي بيلعب معايا مش بياخد باله في وقتها ونيجي أخر الماتش بقى يتصدم انه مغلوب بس للأسف ما يلاقيش اي replays للجولز اللي انا دخلتها ، فكنت بتشتم كتير بسبب الموضوع ده 😀

ده برنامج عملته لما افتح اللعبة منه التراينر يشتغل معاها في الخلفية ويفعل الهوت كي

 كمان فاكر وقتها اني كنت مهتم أوي باسكريبتات المنتديات ومواقع الهوستينج المجانية وتقريباُ كان عندي موقع او منتدى بإسمي ومافيش حد عليه غيري على كل هوست من المشهورين وقتها وكنت مبسوط اوي بالموضوع ده ، واقعد اركب منتدى VBulletin واقعد اضيع ساعات عمال اضيف فيه اقسام وتصنيفات على امل ان ممكن حد يستخدمه ويبقى حاجة مشهورة وفي الاخر امسحه، لحد ما في مرة بالصدفة سمعت عن Apache Server وقعدت فترة كده اقرا وافهم ايه البتاع ده وممكن عادي كده اسطبة عندي في البيت وابقى انا الهوست بتاع المواقع بتاعتي! وكان دي بقى قمة الانبهار بالنسبة لي اني خلاص ماعدتش هقعد في السايبر اضيع وقت في عمل مواقع ومنتديات على هوست مجاني وهعملها في البيت عندي واظبها وفي الاخر ارفعها، انا فاكر اليوم ده كمية الشغف اللي كانت عندي غير طبيعية لدرجة ان وقتها كان معايا موبايل Nokia 7610 -الدمعة- وكان فيه كارت ميموري 64 ميجا، ومساحة الباكيدج الكاملة بتاعت سيرفر الأباتشي اللي كان نازل فيها كل حاجة php + mysql + mail وشوية حاجات كده تقريباُ 96 ميجا، فقعدت في السايبر انزل الملف ده في ساعتين تقريباُ وأول ما نزل ضغطه وقسمته على ملفين عشان اعرف انقل جزء جزء على الميموري واروح البيت انقله وارجع اخد التاني ! وفضل بقى الحوار ده مكيفني فترة طويلة واتعلمت فيها بقى اساسيات php وعملت شوية حاجات هبلة كتير وأبعت ايميلات لوكال لنفسي وكنت مبسوط اوي ان لسه مش عندي انترنت والحاجات دي بعرف استخدمها في البيت، وقعدت بقى اعمل في سكريبتات spam للايميلات وهبل من ده كتير وكنت اتصل باصحابي اقولهم تعالوا شوفوا النت اللي عندي في البيت واتفرجوا على المواقع بتاعتي وكان في وقتها برنامج بينزل المواقع offline عشان تتصفحها بدون انترنت، البرنامج ده فرق معايا في حياتي كتير، كنت بنزل دروس وشروحات من المنتديات بالعبيط واقعد اقراها واتعلمها في البيت، فكنت بشغل الصفحات دي على الأباتشي وأضحك على اصحابي اني فاتح بقى مواقع تانية اهو وواحدة واحدة هنزل مواقع النت كلها عندي 😀

في خلال الفترة دي كنت بدأت اسمع عن حاجة اسمها Linux وتحديداُ Ubuntu و Fedora وبدأت اقرأ في الموضوع ودخلت منتديات “مجتمع لينكس العربي” وبدأت افهم بقى الدنيا شوية ، وكان في منتدى كان ليه فضل كبير بردو في بداياتي بسبب كمية المعلومات الرهيبة اللي اكتسبتها منه وصاحبة ما زال صديقي حتى الأن ، كان اسمه “منتديات غراب” ، كان بدأ يهتم بتوزيعات اللينكس وازاي تطلبها وتوصلك لحد البيت وازاي تشغلها جنب ويندوز او على VMWare، وبالفعل عملت كده ووصلني اصدار أبونتو 7.10 لحد البيت ودي كانت قمة الزهول بالنسبة لي وقتها ، وكنت متحمس جداُ اجرب النظام ده ، وبالفعل قعدت اقرأ كتير جداُ عن الموضوع وأخدت بالي كويس وما عملتش فورمات للهارد كله الحمد لله ، عشان دي كانت أشهر غلطة الناس كلها بتحذر منها وقتها ، وكنت منبهر جداُ بالنظام وبدأت اتعلمه وتخليت عن الويندوز تماماُ وقولت بس انا هبقى لينكساوي أصيل وقعدت بقى اقول لصحابي عليه وانصح الناس بيه عشان يجربوه بس لما لقيت ان النظام مافيهوش الحاجات اللي محتاجها ومتعود عليها في الوقت ده رجعت تاني لويندوز ، لأن وقتها تقريباُ كنت بتستخدم البدايل بتاعت كل حاجة ، ماكنش في اي ابلكيشن موجود على ويندوز ليه دعم على لينكس ، فاضطريت ارجع تاني لويندوز كنظام اساسي واستخدم اوبنتو للترفيه.

خلال الفترة دي كلها من حياتي ولحد قبل دخولي الكلية ، البرمجة بالنسبة لي كانت هواية وكنت واخدها كده بالفهلوة والممارسة ، كنت بدأت اشتري كتب واتعلم منها بس حسيت اني مش فاهم حاجة من المصطلحات العربي والترجمة الغريبة للكلمات ، فترة الثانوية العامة كان الموضوع بدأ يقل شوية وبدأت اهتم بالدراسة ، تالته ثانوي تقريباُ كنت وقفت تماماُ لحد ما خلصت امتحانات ، ورجعت تاني بقوه ونسيت الفيجوال بيسيك 6 دي نهائي وركزت تماماً على الدوت نت و سي شارب وبدأت اتعرف على اصدقاء في المحيط بتاعي وبدأت تجيلنا افكار كويسة نعملها سوا وننشرها على الانترنت وبدأت اشارك مع صديقي في موقع “افهم كمبيوتر” ونعمل برامج تساعد الناس وتحل مشاكلهم وبدأنا نكسب فلوس من الاعلانات والموضوع كان حلو جداُ وبيتطور يوم بعد يوم وبدأ ناس تدخل معانا في الفريق لحد ما حصلت بعض المشاكل وانا كنت لسه في اول ترم في الكلية وكنت هسقط عشان مش مهتم بيها فانفصت عنهم، وجات اللحظة اللي خدت فيها قرار مع نفسي ان الفهلوة دي مش هينفع اكمل بيها حياتي ، واني لازم ابدأ صح واتعلم كل حاجة على اصولها عشان اقدر اوصل واحقق احلامي، وبالفعل بدأت في اجازة الترم الاول من سنة أولى مرحلة تانية في حياتي، مرحلة التعليم اللي على أصوله لكل حاجة تخص علوم الحاسب من مصادر عالميه وموثوقه، وفضلت على هذا الوضع لحد التخرج ان يكون كل همي اثناء الدراسة هو اني اتعلم وبس واني ادي لنفسي وقت كافي اتعلم مع نفسي واشوف كورسات واطبق عليها واعمل مشاريع جانبية وانسى تماماُ موضوع الشغل والفلوس والكلام ده طول الفترة دي لحد ما اتخرج وانا عندي اساس قوي بعدها بقى نبقى نشوف موضوع الشغل ده، مع العلم ان خلال فترة الدراسة كنت نشيط جداُ وبشارك في مؤتمرات واسافر واحضر ايفنتات وانشطة طلابيه وحاجات كتير من دي وده زود معرفتي بحاجات كتير ماكنتش اعرف عنها حاجة واتعرفت بناس بعتز جداً بمعرفتهم ومقابلتهم.

والحمد لله اتخرجت من الكلية وعملنا مشروع تخرج كويس دخلنا بيه مسابقة ابتكار وكسبنا المركز الأول في تصنيف الـ Cloud Computing ، وبسبب مشروع التخرج عرض عليا احد الاصدقاء اني اشتغل معاهم الشهرين اللي قبل دخولي الجيش ، وبالفعل روحت أول شغل ليا مع Benchmark Creative Labs وبعدها دخلت الجيش لمدة سنة -مش هتكلم عنها- وطلعت منها اشتغلت 3 شهور في شركة “Sarmady” وبعدين رجعت تاني لـ بنش مارك ولسه فيها لحد وقت كتابة هذه الكلمات.

انا كتبت التدوينة دي عشان تبقى ذكرى ليا افضل دايماُ فاكر بيها الفترة دي من حياتي عشان أوقات كتير بحس ان الفترة دي مصدر الهام وتشجيع ليا.

ودول شوية Screenshots متفرقة من الحاجات اللي عملتها الفترة دي وطبعاً كلها حاجات تعتبر هبله دلوقتي لأن كلها كان ايام Windows XP وماحدش كان بيستخدمها غيري :

ده كان بيغير صوت الويندوز وهو بيفتح وبيقفل
ده كان برنامج بيغير خلفية الفولدر والأيكونة بتاعته
تقريباً كنت بفكر أعمل مساعد شخصي ليا وقتها بس ما كملتش
تجميعة لشوية قنوات راديو
دي كانت Widget صغيره كده دايماُ ظاهره فوق الساعه بتعرفك استهلاك الرامات، أصحابي كانوا دايماً بيحبوها
تجربة أخرى للـ Sockets
كنت بعمل Silent Installers كمان
دي حاجة تافهه ، بس كانت عقدة حياتي اني الـ Quick Launch بتاعت الديسكتوب تختفي وماكنش في اوبشن في ويندوز إكس بي انك ترجعها تاني
كنت ثعلب محترف بجد يعني مش هزار 😀
كانت محاولة لتجميع حلول لشوية حاجات كده في برنامج واحد
شايفك ياللي بتضحك على الكلام ، بس البرنامج ده كنت بستخدمه كتير جداً وقتها عشان انظم وقتي
شوية لعب وحركات 😀
ده برنامج بيخفي بارتيشنز معينة من الظهور في My Computer
ده برنامج بيراقب الجهاز عن طريقه انه ياخد سكرين شوت كل وقت معين ويحفظهم في فولدر
Nimbuzz ده كان ماسنجر عظيم في وقته ، وده برنامج كان بيخليك تشوف صورة البروفايل بتاع اي حد من غير ما تضيفه

برنامج بسيط للتعديل في Windows Registry
بداية اللعب مع الـ sockets
الـ chat flooding كانت من الحاجات المنتشره جداً في الوقت ده
أغلب الأوامر اللي كنت بحتاجها لما بضغط كليك يمين على فايل

وفي النهاية شكراً جداً ليك على انك قدرت توصل لحد هنا -أتمنى تكون مبسوط- ومتأسف على تضييع وقتك في كلام مش مهم ، ولو كنت من الناس اللي عاصرت الفترة دي أحب اعرف كانت عامله ازاي بالنسبة لك.

4406 Total Views 6 Views Today
  • AbdelRahman Wahdan

    كلام ملوش لازمة ايه بس ، انت رجعتلي ذكريات كتير جميلة جدا 😀 ، انا مبدأتش برمجة زيك بدري كده للأسف ، بس بدأت الفوتوشوب والفلاش ، كان بدايتي الديزاين وأفتكر كان فيه منتدى اسمه أرانيم هو اللي خلاني احب الموضوع اكتر واتعلمت من ناس كتير ، بس اهو اديني دخلت حاسبات وعملت شيفت كارير 😀

    • طب الحمد لله مبسوط اني فكرتك بحاجات جميلة D:

  • Mohamed El Zarkawy

    دائما البدايات ليها أثر فظيع !
    حلو اوي التدوينة وفاكر حجات كتير اوي من البرامج دي
    عودا حميدا للتدوين

    • ربنا يخليك يا محمد ، دايماً بتكون من أوائل الناس اللي بتتابع اللي بعمله ، شكراً على ثقتك كل السنين دي ^_^

  • هااااااااح، انا نسخه طبق الاصل من كل حرف انت كتبته مع فرق اني اكبر منك سنا سيكه .. عملت برامج و Vbulletin plugins و فتحت شركة استضافة مواقع و عملت بيزنس كبير .. و دخلت في hacking teams وعشت كل لحظه انت كاتب عنها. ربنا يمسيك بالخير 🙂

    • مبسوط جداً اني فكرتك بحاجات حلوة من دي ، وسعيد ان كان في تجارب مشتركة عدت علينا D:
      شكراً لتعليقك ^_^

  • مهند صقر

    بالتوفيق يا اسلام اخيرا رجعت تدون تانى

    • تسلم لي يا مهند، ربنا ييسر الأمور ان شاء الله وأرجع أكتب بانتظام

  • Ahmed Maher

    واضح ان تجربة معظم الناس الى بدأت فى الفترة دى متشابهة اذا مكنتش واحده فى بعض الحجات
    مكنتش بتابع المنتديات ديما بس كنت مقيم فى موقع kutub.info انزل الكتب pdf من السيبر و اروح اقرأ فى البيت و عديت على موضوع ال autorun و تصليحه برده بس الحمد لله كنت بعدت بدرى عن ال vb6 و كنت كتبت windows batch script يحل مشكله ال autorun دى و فيرس تانى كان سخيف بيخفى الملفات و الفولدرات اعتقد كان اسمه recycle
    شكرا جدا على الذكريات دى انا حسيت انك يتحكى عن معظم الى حصل معايا برده.

    • أه واضح كده فعلاً ، ولحد الأن لسه عندي على الهارد القديم ملفات كتير من موقع كُـتب وكنت بعمل زيك كده بالظبط D:
      شكراً لتعليقك 🙂

  • Hazem Noor

    فكرتني بحاجات حلوة و ذكريات كنت بدأت أنساها، أنا عيشت فترة شبه دي بس في مجال الويب و ال php سنة 2001 و انا ف تالتة إعدادي
    أيام زي الفل 🙂

    أنا أفتكر إن أول إيميل ليا كان ياهو كنت انا اللي عامله مشيت على خطوات كانت في كتاب ل سنة تالتة اعدادي 😀
    الذكريات بترجع تاني أهي 😀 😀

    انت حمستني أكتب زيك عن الذكريات، الله المستعان

    • طيب كويس أوي اني رجعت لك الذكريات الحلوة دي ، اه لو كتبت هتبقى حاجة جميلة جداً ان شاء الله 😉